Snin iżjed tard, meta Sor Robbiani mietet fis-6 ta' Marzu ta' l-1983, inkiteb li, fost il-merti tagħha bħala Madre Provinċjali, kien hemm li hi fetħet din l-iskola tal-Gudja. Fil-fatt, Robbiani xtrat biċċa art fi sqaq numru 1 ma' triq Santa Katarina. Hemm beda x-xogħol ta' skola ġdida. Bħala perit, ġie maħtur Richard Aquilina halli jidher f'isem il-Kongregazzjoni f'dak li sata' jinqala'. Hu ġie awtoriżżat li jidher f'isimhom anki fil-qorti ċivili.

Fl-istorja ċkejkna ta' din l-iskola, naqraw li kien hemm tmienja jew disa' klassijiet. Ma kienx possibbli li l-għalliema jkunu kollha sorijiet. Bdew jiġu impjegati għalliema lajċi wkoll. It-tagħlim baqa' dejjem l-iskop ewlieni tal-preżenza tas-sorijiet fil-Gudja. Il-kuntatti mal-ministeru ta' l-edukazzjoni kienu jkunu ta' sikwit. F1-1964, meta l-post kien għadu kif inbena mill-ġdid, il-Madre Provinċjali bagħtet l-informazzjonijiet essenzjali dwar din l-iskola. Minn hemm, nafu li l-isem ta' l-iskola kien Santa Govanna Antida, u kienet proprjetà tas-Sorijiet tal-Karità. Kienet infetħet għall-ewwel darba fl-1964. Il-post kien fi triq Santa Katarina. L-iskola kienet kindergarten u primarja. L-għalliema kienu erba' sorijiet u ħames lajċi. Il-kap ta' l-iskola kienet Sor Antonia Falzon. L-iskola kienet kemm għas-subien kif ukoll għall-bniet. Minbarra l-klassi ta' l-iskola kindergarten, kien hemm il-klassijiet kollha, mill-ewwel sa s-sitt waħda tal-primarja. Mill-lista li għandna, nafu li kien hemm 138 subien u 100 bniet.

Nota ta' l-20 ta' April ta' l-1979 fil-Kronaka tas-sorijiet turi li ma setgħux idaħħlu tfal kemm iridu fl-iskejjel tagħhom. Inkiteb: "Il-Gvern ħareġ ordni biex it-tfal ma jkunux iżjed minn tletin kull klassi. Dan ifisser li, għas-sena skolastika li ġejja, ma nistgħux naċċettaw iskrizzjonijiet ġodda għaż-żgħar ta' tliet snin u nofs. Dan ikun jgħodd għall-iskola tal-Gudja, u għall-iskejjel kindergarten l-oħrajn"

Ir-relazzjonijiet dwar il-kunvent tal-Gudja juruna li, billi l-ħidma ewlenija kienet l-iskola, xi diffikuitajiet kien hemm proprju minħabba f'hekk. Fis-snin 1983-87, il-post kien għadu jinħass żgħir. Is-sorijiet lanqas biss ma kellhom il-kamra personali tagħhom. Barra minn hekk, ma setgħux jaċċettaw dawk it-tfal kollha li l-ġenituri tagħhom riedu jibagħtuhom f'dik l-iskola. Is-sorijiet xejn ma kienu sodisfatti b'dik il-parti fejn it-tfal kienu jilagħbu għaliex, meta tkun ix-xita, kien qed jidhol ħafna ilma. Imbagħad, dik il-parti ġiet modifikata b'mod li setgħet tintuża mit-tfal f'kull xorta ta' temp.

Il-post tas-sorijiet u l-iskola tal-Gudja għaddew minn ħafna diffikultajiet tul is-snin tmenin. Kien hemm x'jiġi rranġat fil-kostruzzjoni u fl-immoderniżżar tiegħu. Il-perit, iI-Madre Provinċjali, u l-Ekonoma marru ta' sikwit fil-post ħalli jaħdmu biex jiġi rranġat għall-aħjar. Imma d-dar tas-sorijiet kienet qed isservi għal skopijiet oħrajn ukoll. Mill-1988, il-post tas-sorijiet tqiegħed ukoll għad-dispożizzjoni ta' dawk li organiżżaw laqgħat vokazzjonali djoċesani. Imma, fi żmien qasir, bdiet tinħass il-problema ta' nuqqas ta' vokazzjonijiet fost is-sorijiet.

Fl-1990, mill-erba' sorijiet li kien hemm, tnejn biss kienu jgħallmu. Il-futur ta' i-iskola beda jinħass inċert. Imma huma għamlu ħilithom biex dik tagħhom tkun skola nisranija tassew. F1-1991 , ġie kkummentat li r-relazzjonijiet mal-ġenituri u l-għalliema lajċi kienu tajbin ħafna. L-iskola baqgħet l-għan ewlieni tal-preżenza tagħhom fil-post. Fl-1992, Sor Govanna Saliba, id-Direttriċi, kienet tmexxi b'sens ta' responsabbiltà kbira. Għalkemm tistqarr li kien hemm kollaborazzjoni kbira min-naħa ta' l-għalliema lajċi, kien mixtieq ħafna li sorijiet ikun hemm iżjed. Madankollu, il-viżti li saru, kemm min-naħa tal-Madre Ġenerali kif ukoll minn dik Provinċjali jew minn xi delegata oħra, juru li l-post, għalkemm kellu l-limitazzjonijiet tiegħu, kien addattat ħafna u l-iskop edukattiv kien jintlaħaq tajjeb. Kienet verament ħidma li tista' tissejjaħ appostolat għax is-sorijiet qdewha b'responsabbiltà, serjetà, u mħabba. Imma, fl-1993, il-problema tas-sitwazzjoni minħabba l-liġijiet tal-Gvern kienet tinħass, u s-sorijiet, għalkemm iddiskutewha, ma kienu qed jaslu għall-ebda soluzzjoni konkreta.